समाचार

पूर्वगृहमन्त्री सांसद जनार्दन शर्माले कुमार पौडेल प्रकरणमा

काठमाडौं–नेकपाका नेता एवं सांसद जनार्दन शर्माले विप्लव नेतृत्वको नेकपाका सर्लाही जिल्ला इन्चार्ज कुमार पौडेलको घटना अस्वभाविक भएको बताएका छन् ।सोमबार संसदको राज्यव्यवस्था तथा सुशासन समितिको बैठकमा गृहमन्त्री रामबहादुर थापा र प्रहरी महानिरीक्षक सर्वेन्द्र खनाललाई प्रश्न गर्दै विगतमा झै मुठभेडका नाममा हत्या गर्ने शैलीको झल्को आएको बताए । पूर्वगृहमन्त्री समेत रहेका शर्माले हिजोका दिनका आफ्ना साथीहरु धनमाया लगायतको मुठभेडको नाममा हत्या भएको घटनाको स्मरण गर्दै प्रश्न गरे, ‘के हामी फेरि त्यही घटनालाई दोहोर्यान चाहन्छौँ ?कमसेकम साधारण मानवअधिकारको त पालना त गर्नुपर्छ नि । प्रहरीको संविधान कार्यान्वन गर्नुपर्ने जिम्मेवारी छैन ? यस्ता घटनाका बारेका फेरि प्रश्न सोधिराख्ने ठाउँ नआओस् । पाँच सय जना कार्यकर्ता त पक्राउ गर्नुभएको छ नि, त्यसमा हामीले प्रश्न उठाएका छौँ र ? त्यसलाई वार्तामार्फत अघि बढाउनुपर्छ । उनले गृहमन्त्री रामबहादुर थापाले तलको प्रहरीले जे टिपायो त्यही रिर्पोट प्रस्तुत गरेको बताउँदै आफूसँग जनताको रिर्पोट रहेको बताए । उनले भने, ‘कुमार पौडेलको घटनामा सरकारको एउटा रिर्पोट होला । तर हामीसँग जनताको रिर्पोट पनि छ, फोटो पनि छ । पाँच छ ठाँउमा त हात नै भाँचिएको छ । पहिले हात भाँचियो कि गोली हानेर हात भाँचिएको हो ?
यसले त विद्रोह ल्याउँछ ।’ उनले अहिले जनता डिजिटल युगमा रहेको बताउँदै तथ्यलाई बंग्याउन थालियो भने जनताले विश्वास नगर्ने बताए । उनले

अहिलेको सूचना प्रविधिको युगमा झुटो बोलेर भ्रम छर्न नसकिने बताए । नेपाल प्रहरी पनि सूचना प्रविधिको प्रयोगमा अभ्यस्त भइसकेको बताउँदै प्रहरी महानिरीक्षक सर्वेन्द्र खनाललाई प्रश्न गरे, ‘अहिलेको डिजिटल समयमा आइजीलाई को कहाँ बस्छ भन्ने सूचना आउँदैन ? आउँछ नि, किन आउँदैन ? हिजो हामी द्धन्द्धमा छँदा प्रहरीले पनि त्यस्ता घटना नघटाइदिएको भए हामीसँग जनसमर्थन बढ्दैनथ्यो कि । त्यसैले प्रहरीले पनि द्धन्द्धलाई बढाउने काम गर्नुहुँदैन । यो घटनाको सत्यतथ्य छानविन र दोषीलाई कारवाही होस् ।’ उनले विप्लवमा प्रतिबन्द्ध लगाउन आवश्यक थियो भन्ने प्रश्न गर्दै द्धन्द्ध बढाउने काम नगर्न आग्रह गरे । द्वन्द्व भड्काउने, संविधानको पालना नगर्ने समूह अहिले पनि क्रियाशील रहेको बताउँदै उनले द्वन्द्वतिर नभई शान्तितिर जानुपर्नेमा जोड दिए । उनले भने, ‘राजनीतिक रुपले अर्को द्वन्द्वको सुरुवात हुनुहुँदैन । संविधानले सबै व्यवस्था गर्दा पनि मुलुक फेरि द्वन्द्वको बाटोमा अघि बढनुहुँदैन । हामीसँग संविधान छ, त्यसको सरकार र हामी सबैले काम गर्नुपर्छ । संविधानको कार्यान्वन नगर्नु नै समस्या हो ।’ नेता शर्माले जनताको मनोभावना बुझेर मात्र काम गर्न पनि सुझाव दिए । जनताको मनोभावना बुझेर मात्रै कानुन बनाउनुपर्ने रैछ भन्ने कुरा गुठी आन्दोलनले प्रष्ट पारेको उनले बताए ।

Related Articles

Back to top button